Վրաց-ռուսական սահման տանող ճանապարհը փակ է ծանր բեռնատարների համար

Մցխեթա-Ստեփանծմինդա-Լարս ավտոճանապարհի Գուդաուրի-Կոբի հատվածում (ճանապարհը դեպի ՌԴ սահման) ձյան և մերկասառույցի պատճառով կցորդով և կիսակցորդով ավտոմեքենաների երթևեկությունը դեռևս արգելված է։ Այս մասին հայտնում է Վրաստանի ավտոճանապարհների դեպարտամենտը։

Ճանապարհը բաց է մարդատար ավտոմեքենաների համար։ Միաժամանակ Մլետա-Գուդաուրի և Գուդաուրի-Կոբի հատվածներում երթևեկությունն իրականացվում է առանց կանգառի միայն պարեկային ոստիկանության հսկողության տակ գտնվող ձնահոսքերից պաշտպանված թունելներով։

Ձյան տեղումները խնդիրներ են ստեղծել Բաթումի-Ախալցխա կենցաղային նշանակության ճանապարհի 86-106 կմ-ին։ Այստեղ տեղաշարժը թույլատրվում է միայն բարձր անցանելիություն ունեցող մեքենաների համար։ Մնացած տրանսպորտի բոլոր տեսակների համար երթեւեկությունն արգելված է։