Սերբիայի նախագահը փաստացի ընդունել է, որ իրենք կորցրել են Կոսովոն

Սերբիան պետք է ընդունի փաստը, որ Բելգրադը որևէ վերահսկողություն չունի Կոսովոյի նկատմամբ: Այդ մասին Սերբիայի խորհրդարանում ելույթում ասել է երկրի նախագահ Ալեքսանդր Վուչիչը. հայտնում է РТС-ն:

«Ես որոշեցի չշարունակել սուտը և ինքնախաբեությունը, ես բոլորին ասացի, որ չկա Սերբիայի իշխանություն, չկա մեր կառավարությունը Կոսովոյում և Մետոխիում, և մենք պետք է դադարենք խաբել մեր սեփական հասարակությանը»,- ասել է Վուչիչը:

Ըստ նրա` գոյություն ունի Կոսովոյի խնդրի լուծման երկու սցենար: Առաջինը ստատուս քվոյի պահպանումն է և «սառեցված հակամարտությունը»: Երկրորդը` Բելգրադի և Պրիշտինայի միջև հարաբերությունների կարգավորումը: Վուչիչն ընդգծել է, որ ինքը հանդես է գալիս երկրորդի օգտին: