Անձամբ Նաիրա Զոհրաբյանը Թուրքիայից տարածքային պահանջ ունի

Այսօր ԱԺ ԲՀԿ խմբակցության նախագահ Նաիրա Զոհրաբյանը, լրագրողների հետ զրույցում պատասխանելով Yerkir.am-ի այն հարցին, թե Հայաստանն այսուհետ աշխատելու է Հայոց ցեղասպանության ճանաչմա՞ն, թե՞ պահանջատիրության ուղղությամբ, պատասխանեց. «Մենք այս փուլում դեռևս աշխատում ենք Ցեղասպանության ճանաչման ուղղությամբ և ժխտողականության, մերժման դեմ, իսկ մնացած հարցերին պետք է պատասխանեն այն պրոֆեսիոնալները, որոնք կկազմեն ճիշտ ճանապարհային քարտեզ, թե որ փուլում մենք ինչ պետք է անենք: Հասկանալի է, որ ապրիլի 25-ից հետո մեզ համար սկզվում է նոր քաղաքական օրակարգ»:

Հարցին, թե Հայաստանը Թուրքիայից տարածքային պահանջ չունի՞, Նաիրա Զոհրաբյանը պատասխանեց. «Ես անձնապես տարածքային պահանջ ունեմ, բայց գտնում եմ, որ մենք պետք է կարողանանք ճիշտ, գրագետ, քայլերով առաջ գնալ, որպեսզի տանուլ չտանք»:

Այն դիտարկմանը, որ ՀՀ նախագահը հայտարարել է, որ Հայաստանի արտաքին քաղաքական օրակարգում տարածքային պահանջի խնդիր չի եղել և չկա, Նաիրա Զոհրաբյանը պատասխանեց, որ չի կարող դա մեկնաբանել, քանի որ դրա մասնագետը չէ, և գուցե պատմաբանները, ցեղասպանագետները ճիշտ գիտեն, թե ինչ ճանապարհային քարտեզով առաջնորդվել, որպեսզի տանուլ չտանք ամենամեծ արտաքին քաղաքական հարցը: