Ադրբեջանական զինուժը գնդակոծել է Բարեկամավանը

Մայիսի 23-ի կեսօրից մինչև ժամը 18-ը ադրբեջանական զինուժը խոշոր տրամաչափի գնդացիրներից կրակ է բացել Տավուշի մարզի Բարեկամավան գյուղի և դրա պաշտպանական դիրքերի վրա: Այս մասին aravot.am-ին հայտնել են Բարեկամավանի բնակիչները:

Ադրբեջանցիները կրակել են սահմանը պաշտպանելու համար հերթափոխի մեկնող զինվորական մեքենայի, բարեկամավանցիներից մեկի «ԶԻԼ» մակնիշի ավտոմեքենայի վրա: Գնդակներից երկուսը խոցել են Բարեկամավանի նախկին գյուղապետ Հովիկ Ղարաքեշիշյանի առանձնատան տանիքը: Գնդակներից մեկը, ծակելով տանիքը և տանիքը պահող շինարարական կառուցվածքները, ընկել է տան միջանցք:

Aravot.am-ը փորձեց տեղեկություններ ստանալ Բարեկամավանի գյուղապետ Գարիկ Աբազյանից, սակայն նրա հեռախոսահամարն անհասանելի էր: Զինվորական աղբյուրները տեղեկացրել են, որ հայ սահմանապահները համարժեք պատասխան են տվել, որից հետո ադրբեջանական զինուժը դադարեցրել է կրակը: