Էրդողանը հայտարարել է, որ լավ լուրեր կհայտնի թուրքական Կիպրոսում

Թուրքիայի նախագահ Ռեջեփ Թայիփ Էրդողանը հայտարարել է, որ Հյուսիսային Կիպրոսի թուրքական հանրապետություն (ՀԿԹՀ) կատարելիք այցի ընթացքում, որը նախատեսված է երկուշաբթի՝ հուլիսի 19-ին, ինքը լավ նորություններ կհայտնի:

«Ես ուզում եմ այդ մասին հայտարարել ՀԿԹՀ խորհրդարանում: Դա կլինի դրական քայլ, որի նախնական նախապատրաստական աշխատանքներն ավարտված են»,- ասել է Թուրքիայի առաջնորդը լրագրողներին Ստամբուլի Այա Սոֆիա մզկիթում ուրբաթօրյա աղոթքից հետո: Նրա խոսքերը մեջբերում է Anadolu-ն:

Ըստ Թուրքիայի առաջնորդի՝ հայտարարությունը, որն ինքը նախատեսում է հնչեցնել, կդառնա «խաղաղության ուղերձ» ինչպես կղզու բնակիչների, այնպես էլ ամբողջ միջազգային հանրության համար:

Էրդողանն ասել է, որ Կիպրոս կատարելիք այցի ընթացքում, որը կշարունակվի մինչեւ երեքշաբթի, իրեն կուղեկցի մեծ պատվիրակություն:

Հիշեցնենք, որ Ադրբեջանի խորհրդարանական պատվիրակությունը նույնպես այցելելու է Կիպրոսի օկուպացված հյուսիսում ձևավորված ինքնահռչակ հանրապետություն։