Չինաստանը կոչ է անում չեղարկել Իրանի դեմ պատժամիջոցները

Ապրիլի 2-ին Չինաստանի ԱԳՆ խոսնակը ԱՄՆ-ին կոչ է արել չեղյալ հայտարարել Իրանի դեմ պատժամիջոցները՝ ասելով, որ պատժամիջոցների վերացումն անհրաժեշտ է, որպեսզի երկիրը վերադառնա JCPOA-ին: Այս մասին հայտնում է իրանական Mehr News գործակալությունը:

Չինաստանի արտաքին գործերի նախարարության խոսնակ Հուա Չունինգը հայտարարել է, որ Իրանի միջուկային խնդիրը օդում կախված է, նաև հավելել է, որ Չինաստանն արդար դիրքորոշում է որդեգրել և այս առումով կառուցողական դեր է խաղացել:

Նա շեշտել է, որ Չինաստանը հաջորդ շաբաթ մասնակցելու է Վիեննայում կայանալիք հանդիպմանը, որի ընթացքում քննարկվելու են JCPOA-ի պահպանման հարցում կոնսենսուսի հասնելը և միջուկային գործարքին փուլային ու փոխադարձ վերադարձի ճանապարհային քարտեզի նախապատրաստումը:

Չինացի դիվանագետը նշել է, որ ԱՄՆ-ի՝ միջուկային գործարքից միակողմանի դուրս գալը իրանական միջուկային ծրագրի սրման հիմնական պատճառն է, նաև` որ Չինաստանը ողջունում է Միացյալ Նահանգների վերադարձը JCPOA:

«Չինաստանը կաշխատի JCPOA-ի մյուս կողմերի հետ` իրանական միջուկային խնդրի քաղաքական կարգավորումն առաջ տանելու համար` միաժամանակ պաշտպանելով գործարքի կողմերի օրինական իրավունքներն ու շահերը»,- ասել է երկրի ԱԳՆ խոսնակը: