Ադրբեջանում քաղբանտարկյալների թիվը համաճարակի ընթացքում կրկնապատկվել է

Բաքվից TolishMedia-ի թղթակիցը հայտնում է, որ Ընտրությունների և ժողովրդավարության կրթության մոնիտորինգի կենտրոնը COVID-19 համաճարակի ընթացքում տարածել է ակնարկ-փաստաթուղթ Ադրբեջանում քաղաքական իրավիճակի վերաբերյալ:

Զեկույցի համաձայն` Ադրբեջանի նախարարների կաբինետը գերազանցում է իր լիազորությունները՝ սահմանափակելով քաղաքացիների սահմանադրական իրավունքներն ու ազատությունները: Համաճարակի ընթացքում նաև անհամաչափ տույժեր են մտցվել, տեղի են ունեցել ոստիկանության չարաշահումներ և ուժեղացվել են քաղաքական դրդապատճառներով բռնաճնշումները: Համաճարակի նախօրեին երկրում եղել է 104 քաղբանտարկյալ, համաճարակի ընթացքում բռնաճնշումները սկսել են աճել, և քաղբանտարկյալների թիվը գրեթե կրկնապատկվել է:

Հիշեցնենք, որ կարանտինի առաջին 3 ամիսներին 33 ակտիվիստ է ձերբակալվել, իսկ 6-ը՝ մեղադրվել քաղաքական դրդապատճառներով հարուցված քրեական մեղադրանքներով: Իշխանությունների 56 քննադատ ենթարկվել է քաղաքական ճնշման այս կամ այն ձևով: