Ֆրանսիայում պատրաստվում են ոչնչացնել միլիոնավոր լիտրերով գարեջուր

Ֆրանսիայի գարեջրագործների միությունը զգուշացրել է, որ ստիպված է ոչնչացնել 10 մլն լիտր գարեջուր, քանի որ, կորոնավիրուսի համաճարակով պայմանավորված, փակվել են սրճարանները, ռեստորաններն ու փաբերը. տեղեկացնում է yerkir.am-ը` BFM-ին հղումով:

«Ռեստորանների, սրճարանների կտրուկ փակումը, զբոսաշրջային գործունեության կանգը և բոլոր փառատոների ու միջոցառումների չեղարկումը հանգեցրել են այն բանին, որ ավելի քան  10 մլն լիտր գարեջուր պահանջարկ չունի»,- ասվում է գարեջրագործների միության հայտարարության մեջ:

Գարեջուրը ոչնչացվելու է, քանի որ դրա պիտանիության ժամկետը մոտենում է ավարտին, և այն պահելն այլևս անիմաստ է: Ընդ որում` ոչնչացումը մեծ գումարների վնաս կհասցնի արտադրողներին:

Ավելի վաղ Ֆրանսիայի գարեջրագործների 70 տոկոսը հայտարարել էր մարտի կեսին ապրանքաշրջանառության առնվազն կրկնակի կրճատման մասին:

Ի դեպ, լուրջ խնդիրներ ունեն նաև Ռուսաստանի գարեջրագործները: Ըստ EADaily-ի` նրանք դիմել են ՌԴ կառավարությանը` կորոնավիրուսի տարածման պայմաններում իրենց ձեռնարկություններին աջակցություն տրամադրելու առաջարկով: