Պորոշենկոն հնարավոր է հարցաքննվի ստի դետեկտորի միջոցով

Ուկրաինայի Հետաքննությունների պետական բյուրոն երրորդ անգամ կհարցաքննի երկրի նախկին նախագահ Պյոտր Պորոշենկոյին։ Այս անգամ չի բացառվում պոլիգրաֆ սարքի (ստի դետեկտոր) կիրառումը․ գրում է Известия-ն՝ վկայակոչելով Հետաքննությունների պետբյուրոյի ղեկավար Ռոման Տուբային։

Տուբան չի մանրամասնել, թե կոնկրետ որ գործի շրջանակում է կրկին հարցաքննվելու Պորոշենկոն, սակայն, ըստ փաստաբան Անդրեյ Պորտնովի, նախկին նախագահը  հարցաքննության է կանչվելու «փողերի լվացման գործով»:

Հիշեցնենք, որ ավելի վաղ Կիևի Պեչյորսկի շրջանի դատարանը պետական բյուրոյին թույլատրել էր Պորոշենկոյին հարցաքննելու համար պոլիգրաֆ կիրառել, ընդ որում՝ այն հնարավոր է կիրառել միայն նախկին նախագահի համաձայնությամբ:

Ի դեպ, Պորոշենկոն ասել է, որ չի վստահում Հետաքննությունների պետական բյուրոյին և պատրաստ է հրապարակային  հանձնել պոլիգրաֆ թեստը։