Դիարբեքիրի պատմական պարիսպների մի հատված շինարարական աշխատանքների պատճառով փլվել է

Թուրքիայի` ՅՈւՆԵՍԿՕ-ի պաշտպանության տակ գտնվող Դիարբեքիր քաղաքի պատմական պարիսպների մոտ շինարարական աշխատանքների հետևանքով 2 մետր փլուզում է տեղի ունեցել. հաղորդում է Mezopotamya գործակալությունը:

ՅՈւՆԵՍԿՕ-ի Համաշխարհային մշակութային ժառանգության ցուցակում գտնվող Դիարբեքիրի պատմական պարիսպները շարունակում են մեծ վնասներ կրել «Տիգրիսի հովիտ» (Dicle Vadisi) կոչվող այգու շինարարության հետևանքով: Թուրքիայի շրջակայքի և քաղաքաշինության նախարարության կողմից իրականացվող «Տիգրիսի հովիտ զվարճանքի հրապարակի ծրագիրը» քաղաքում մեծ դժգոհությունների պատճառ էր դարձել: ՅՈւՆԵՍԿՕ-ի պատվիրակությունը դիտարկումների արդյունքում նշել էր, որ այս ծրագիրը մեծ վնաս է հասցնում տարածաշրջանի էկոլոգիական համակարգին, և դրա արդյունքում շինարարությունը դադարեցվել էր: Այնուհետև Դիարբեքիրի վարչական դատարանը չեղյալ էր հայտարարել շինարարության թույլտվության որոշումը: Սակայն ընտրություններից հետո շինարարությունը վերսկսվել է, քանի որ այն նախագահ Ռեջեփ Թայիփ Էրդողանի նախընտրական խոստումներից մեկն էր: Շինհրապարակը կառուցվել էր պարիսպների ամենաթույլ հատվածում, ինչի արդյունքում 2 մետր փլուզում է եղել: