Իրանը դադարեցրել է միջուկային գործարքի շրջանակում իր որոշ պարտավորությունների կատարումը. հայտնի են դրույթները

Իրանը դադարեցնում է միջուկային գործարքի շրջանակում որոշ պարտավորությունների կատարումը: Այդ մասին ասվում է Իրանի ազգային անվտանգության գերագույն խորհրդի հայտարարությունում. հայտնում է РИА Новости-ն:

«Իրանը ներկայիս փուլում իրեն չի համարում պարտավորված հետևել սահմանափակումներին, որոնք կապված են  հարստացված ուրանի և ծանր ջրի պաշարների պահման հետ»,- ասվում է հայտարարությունում:

Նշենք, որ միջուկային համաձայնագրով նախատեսված էր, որ Իրանի ծանր ջրի պաշարները չպետք է գերազանցեն 130 տոննան, իսկ հարստացված ուրանինը` 300 կգ: Ծանր ջրի պաշարների ավելցուկն Իրանը վաճառում էր, իսկ հարստացված ուրանինը` փոխանակում «դեղին կարկանդակի» հետ` կոնցենտրատ, որը ստանում են ուրանի հանքաքարը մշակելու ընթացքում:

Իրանը նաև 60 օր է տվել միջուկային գործարքի անդամ երկրներին, որպեսզի նրանք կատարեն իրենց պարտավորությունները, այդ թվում` բանկային և նավթային ոլորտներում Թեհրանի շահերն ապահովելու համար: