Քրդական կուսակցությունը պատրաստվում է Մուշի ընտրությունների վերաբերյալ բողոքն ուղարկել ՄԻԵԴ

Քրդամետ Ժողովուրդների դեմոկրատական կուսակցության համանախագահ Փերվին Բուլդանը հայտարարել է, որ պատրաստվում են դիմել Սահմանադրական դատարան և ՄԻԵԴ. հաղորդում է gazeteduvar.com.tr կայքը:

Պատճառն այն է, որ Թուրքիայի Բարձրագույն ընտրական հանձնաժողովը մերժել է ԺԴԿ բողոքարկումը Մուշ և Մալազգիրտ (Մանազկերտ) քաղաքներում ընտրության արդյունքների վերաբերյալ: Մուշում 2500 քվե անվավեր է ճանաչվել, իսկ Մանազկերտում, որտեղ անվավեր է ճանաչվել 432 քվե, իշխող ԱԶԿ թեկնածուն հաղթել է ընդամենը 3 ձայնի տարբերությամբ: ԺԴԿ-ն վերահաշվարկի պահանջով դիմել է ԲԸՀ, սակայն մերժում է ստացել, ինչն առաջացրել է կուսակցության դժգոհությունը: Այս փաստով Մուշ են այցելել կուսակցության համանախագահը, պատգամավորներ Կարո Փայլանը և Հյուդա Քայան:

Մուշում առաջադրված թեկնածու Սարը Սաքըքը հայտարարել է, որ 5 անգամ դիմել են ԲԸՀ, սակայն առանց որևէ հիմնավորման մերժում են ստացել, իսկ իշխող կուսակցության ցանկացած բողոքարկում անմիջապես ընդունվում է: