Հյուսիսային պողոտայում Օսիպյանը զրուցեց օտարերկրացի երաժշտի հետ

Այսօր Հյուսիսային պողոտայում տասնյակ երաժիշտներ ինքնաբուխ և յուրատեսակ բողոքի ակցիա էին իրականացնում` ի պաշտպանություն փողոցում երգող ու նվագող երաժիշտների: Հիշեցնենք, որ նախօրեին Հյուսիսային պողոտայում միջադեպ էր եղել` օտարերկրացի երաժիշտների մասնակցությամբ, ինչին միջամտել են ոստիկանները,  արգելել նրանց նվագել փողոցում, բերման ենթարկել ոստիկանության բաժին: Ի նշան բողոքի, այսօր բազմաթիվ երաժիշտներ դուրս են եկել Հյուսիսային պողոտա և սկսել են երգել ու նվագել: Բողոքի ակցիան կրում էր «Երաժշտությունն ընդդեմ բռնության» խորագիրը:

Այսօր էլ ոստիկանապետ Վալերի Օսիպյանը հայտարարեց, որ ոստիկանները ստիպված են եղել միջամտել, քանի որ երաժիշտներից մեկը ոչ սթափ վիճակում է եղել և հայհոյել է: Ի դեպ, այսօր երաժիշտների բողոքի ակցիային ներկա էր ինչպես  ոստիկանապետ Վալերի Օսիպյանը, այնպես էլ միջադեպի մասնակից` ուկրաինացի երաժիշտը, որին ոստիկանները ոստիկանության բաժին էին տարել: Օսիպյանը նրա հետ կարճ զրույց ունեցավ, ասելով, որ երաժիշտը իրեն ճիշտ չի պահել, եղել է ալկոհոլի ազդեցության տակ: