"Դեպի բարիկադներ" վանկարկումներով բողոքի լարված ակցիա` Հյուսիսային պողոտայում

Այս պահին լարված իրևավիճակ է Հյուսիսային պողոտայում: Yerkir.am-ի թղթակիցը տեղից հաղորդում է, որ 500-ից ավելի ակտիվիստներ բողոքի ակցիա են կազմակերպել ՄՄ-ին միանալու` Սերժ Սարգսյանի որոշման դեմ: Ակցիայի մասնակիցները փողոց են դուրս եկել Հայաստանի եւ Ուկրաինայի դրոշներով, պարզել են նաեւ մեծ սեւ ժապավեն` «Դեպի' բարիկադներ» գրառմամբ:

Yerkir.am -ի թղթակիցը Հյուսիսային պողոտայից տեղեկացնում է, որ այնտեղ է գտնվում Երեւանի ոստիկանապետ Աշոտ Կարապետյանը: Ոստիկաններն անընդհատ հայտարարում են, թե կազմակերպված ակցիան անօրինական է, ակտիվիստները թույլ են տալիս հասարակական կարգի խախտում, որը կպատժվի օրենքի ամբողջ խստությամբ:

Ակտիվիստները այս պահին Հյուսիսային պողոտայով վեր ու վար են անում, քանի որ պողոտայից նրանց ճանապարհներն ու ելքերը փակել են ոստիկանության շուրջ 200 աշխատակիցներ: Բողոքի ակցիայի մասնակիցները փորձում են մոլորեցնել ոստիկաններին ու ճեղքել ոստիկանական պատնեշը: Ակցիայի մասնակիցները վանկարկում են «Սերժիկ պուտինկա» արտահայտությունը:

Ակցիայի կազմակերպիչների թվում են ԱԺ «Ժառանգություն» խմբակցության ղեկավար Զարուհի Փոստանջյանը, «Ժառանգության» փոխնախագահ Արմեն Մարտիրոսյանը, Արթուր Սաքունցը եւ այլք:

Ոստիկանների թիվը Հյուսիսային պողոտայում, ըստ մեր թղթակի, գնալով ավելանում է: