Ո´չ ներկա եմ եղել, ո´չ էլ` ականատես. Ռոստոմյանը՝ Օլիմպավանում կատարվածի մասին

Կառավարության նիստից առաջ լրագրողները ԱԻ նախարար Հրաչյա Ռոստոմյանից հետաքրքրվեցին երեկվա աղմկահարույց միջադեպի մասին:

Հիշեցնենք, որ, ոստիկանության հաղորդագրության համաձայն, կողոսկրի կոտրվածքով եւ այլ վնասվածքներով «Արմենիա» բժշկական կենտրոն տեղափոխված 50-ամյա տղամարդը ոստիկանությանը հայտնել է, որ Հայաստանի ազգային օլիմպիական կոմիտեում նրան հարվածել է Գագիկ Ծառուկյանը, ապա ձեռքերով և ոտքերով բազմաթիվ հարվածներ են հասցրել Գագիկ Ծառուկյանի անվտանգության ղեկավար՝ 46-ամյա Էդուարդ Բաբայանն ու ևս մեկ անձ, որի ինքնությունը պարզվում է։ Միջադեպին ներկա է եղել Արտակարգ իրավիճակների նախարար Հրաչյա Ռոստոմյանը:

Մինչդեռ այսօր Հրաչյա Ռոստոմյանը հերքում է, որ ներկա է եղել միջադեպին: «Ձեր ասած միջադեպին ո'չ ներկա եմ եղել, ո'չ էլ` ականատես»,- ասաց նախարարը:

Նա չցանկացավ մանրամասնել, թե ինչ է հաղորդել Քննչական կոմիտեին` ասելով, թե դա նախաքննական գաղտնիք է:

Նախարարը պնդեց` ճանաչում է տուժողին, սակայն իր ներկայությամբ որևէ խնդիր չի եղել: