Հույն զինծառայողները կրակ են բացել՝ իրենց կղզու վրայով թռչող թուրքական ուղղաթիռին զգուշացնելու համար

Հունաստանի Դոդեկանես արշիպելագի Կաստելորիզո կղզու մոտ գտնվող Ռո կղզյակի տարածքում նկատվել է թուրքական օդուժին պատկանող ուղղաթիռ, որից հետո հույն զինծառայողները նախազգուշական կրակոցներ են արձակել:

Ըստ Ekathimerini-ի՝ Հունաստանի պաշտպանության նախարարությունը հաստատել է, որ նկատված ուղղաթիռը պատկանել է Թուրքիայի ԶՈւ-ին, որի օդաչուները միացրած չեն եղել լուսարձակները, ինչի հետևանքով սահմանապահները միանգամից չեն նկատել այն, օբյեկտը ֆիքսել են Ստրոնգիլի կղզում գտնվող զինծառայողները:

Կրակոցներից հետո թուրքական ԶՈւ-ին պատկանող ուղղաթիռը փոխել է ուղղությունն ու վերադարձել Թուրքիայի տարածք:

Թուրքական կողմը որևէ կերպ չի մեկնաբանել դեպքը: