«Ծառուկյան» խմբակցությունը միացավ «Ելք»-ի ստորագրահավաքին

Մեկնարկել է ԱԺ 6-րդ գումարման հերթական նիստը: Մտքերի փոխանակման ժամանակ ԱԺ «Ելք» խմբակցության ղեկավար Նիկոլ Փաշինյանը նշեց, որ իրենց խմբակցությունն առաջարկում է փետրվարի 16-ին` ժամը 11:00-ին, հրավիրվել արտահերթ նիստ` Հարկային օրենսգրքում փոփոխություններ անելու թեմայով:

«27 պատգամավորների ստորագրություն է հարկավոր: «Ելք»-ը ստորագրելու է: Կոչ ենք անում այն պատգամավորներին, ովքեր պատրաստ են ստորագրել թանկացումների վերաբերյալ արտահերթ հրավիրելու համար, անել դա»,- ասաց նա:

ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանն էլ արձագանքեց, որ իրենց խմբակցությունը միանալու է ստորագրահավաքին: ««Ծառուկյան» դաշինքը կմիանա և կմասնակցի «Ելք»-ի գործընկերների ստորագրահավաքին: Այդ օրենքի վերաբերյալ մեր կարծիքները ընդհանրություն ունեն: Բացի այդ` կառավարությունը խոստացել էր, որ փոփոխություններ կանի օրենսգրքում, բայց ուշացնում է և գոնե կոսմետիկ փոփոխությունների էլ չի գնում»,- նշեց նա:

ԱԺ փոխնախագահ Էդուարդ Շարմազանովն ասաց. «Աչքներս լույս, մի հատ էլ արտահերթ կլինի»: