Կառավարությունը հաստատեց «Անվտանգության խորհրդի կազմավորման և գործունեության մասին» օրինագիծը

Կառավարության այսօրվա նիստում արդարադատության նախարար Դավիթ Հարությունյանը ներկայացրեց «Անվտանգության խորհրդի կազմավորման և գործունեության մասին» ՀՀ օրենքի նախագիծը հաստատելու մասին հարցը: Սահմանադրական փոփոխությունների արդյունքում Ազգային անվտանգության խորհուրդը վերանվանվեց Անվտանգության խորհուրդ, ամրագրվեց, որ Անվտանգության խորհուրդը սահմանում է պաշտպանության ոլորտի քաղաքականության հիմնական ուղղությունները:

Բացի այդ` 2015 թվականի փոփոխություններով` Հայաստանի Հանրապետության Սահմանադրության 152-րդ հոդվածի 1-ին մասով սահմանվել է, որ վարչապետը գլխավորում է Անվտանգության խորհուրդը, որի կազմավորման և գործունեության կարգը սահմանվում է օրենքով:

Սահմանվում է Անվտանգության խորհրդի կազմը, այն բաղկացած է լինելու վարչապետից, փոխվարչապետերից, ԱԽ քարտուղարներից, ԱԳ նախարարից, պաշտպանության նախարարից, ԱԱԾ տնօրենից, ոստիկանության պետից և ԶՈՒ ԳՇ պետից։