Եվրախորհուրդը իրավական քայլերի կգնա Իլգար Մամեդովի գործով

Եվրոպայի խորհրդի նախարարների կոմիտեն պաշտոնապես իրազեկել է Ադրբեջանին, որ մտադիր է իրավական  գործողությունների դիմել` կապված Իլգար Մամեդովի գործով ՄԻԵԴ-ի որոշման կատարումն ապահովելու անհրաժեշտության հետ. հայտնում է Turan-ը:

Հոկտեմբերի 25-ի նիստում Կոմիտեն որոշում է կայացրել գործընթաց սկսել, որը մտցվել էր 2010-ին: Դրա համաձայն` գործը կարող է վերադարձվել ՄԻԵԴ, որպեսզի որոշվի` արդյո՞ք որոշման չկատարումը կոնվենցիայի լրացուցիչ խախտում է:

Ադրբեջանին մինչև նոյեմբերի 29-ը ժամանակ է տրվել` իր կարծիքը գրավոր ներկայացնելու համար:

Մամեդովը ձերբակալվել է 2013 թվականի փետրվարին՝ բողոքի ակցիաներ կազմակերպելու մեղադրանքով: Մարդու իրավունքների եվրոպական դատարանը պահանջել էր ազատ արձակել նրան: