Գերմանիան թուրք զինվորականների՝ ապաստան խնդրելու դիմումները բավարարել է

Գերմանիան  ուսումնասիրել է թուրք զինվորականների՝ ապաստան խնդրելու մասին դիմումները և որոշում կայացրել` դրանցից մի քանիսը բավարարել. տեղեկացնում է Ermenihaber-ը:

Միջանկյալ նշենք, որ վերոնշյալ զինվորականները թուրքական իշխանությունների կողմից մեղադրվում են ռազմական հեղաշրջման փորձի հետ կապ ունենալու մեջ:

Ըստ թուրքական Gazetekarinca թերթի կայքի՝ նշյալ տեղեկությունը հայտնել է գերմանական Die Welt պարբերականի թուրքական ծառայությունը՝ հղում անելով  Գերմանիայի ներքին գործերի նախարարության աղբյուրներին: Այն զինվորականները,  որոնց դիմումները բավարարվել են, նախկինում ծառայում էին Գերմանիայում՝ ՆԱՏՕ-ի առաքելության շրջանակներում, սակայն հեղաշրջման փորձից հետո նրանք ազատվել էին աշխատանքից ու գտնվում են հետապնդման մեջ: Աղբյուրը տեղեկացնում է,  որ նրանք  ունեն դիվանագիտական անձնագրեր:

Թե  քանի՞ զինվորականների  դիմումներ են բավարարվել, աղբյուրը չի մանրամասնում, սակայն տեղեկացնում է, որ  ռազմական հեղաշրջման օրից մինչ 2017թ. մայիսի սկիզբը 414 զինվորական, դիվանագետ և բարձրաստիճան պաշտոնյա  իրենց ապաստան տրամադրելու դիմում են ներկայացրել: Նշվում է, որ այս ամենը թուրք-գերմանական հարաբերություններում կարող է առաջացնել նոր ճգնաժամ: