2017-ին կրճատումների արդյունքում հնարավոր կլինի տնտեսել 3.9 միլիարդ դրամ. Դավիթ Հարությունյան

Կառավարության այսօրվա նիստում կառավարության աշխատակազմի ղեկավար-նախարար Դավիթ Հարությունյանը զեկուցեց նոր վարչապետի բոլոր հանձնարարականների  կատարման ընթացքի մասին:

Ըստ նրա` մինչ հունվարի 12-ը տրված հանձնարարականների հիման վրա մշակվել է 101 նախագիծ, որոնցից 51-ն արդեն ընդունվել է: Հարությունյանը խոսեց գնումների ոլորտում տեղի ունեցած փոփոխությունների մասին՝ նշելով, որ նոր համակարգը բարձրացրել է կառավարության հաշվետվողականությունն ու գնումների թափանցիկությունը: Նա անդրադարձավ նաև  պետական համակարգի արդիականացմանը` ասելով, որ ոլորտի փոփոխություններից մեկը եղել է լիազորությունների ապակենտրոնացումը:

Դավիթ Հարությունյանը խոսեց նաև ՊՈԱԿ-ների աշխատակազմերի և ԾԻԳ-երի օպտիմալացումների մասին: «2017 թվականին կրճատումների արդյունքում հնարավոր կլինի տնտեսել 3.9 միլիարդ դրամ»,- ասաց նա:

Հարությունյանը խոսեց բիզնես միջավայրը բարելավելու վերաբերյալ՝ մատնանշելով էլեկտրոնային եղանակով լիցենզիաների տրամադրման մեխանիզմների ներդրումն ու գյուղոլորտում վերամշակող կամզակերպությունների սպառվող գազի սակագնի մեղմացման որոշումը: