Թուրքիայի և Ռուսաստանի հարաբերությունների սառեցման մեղավորը երրորդ ուժեր են. թուրք նախկին նախարար

Թուրքիայի և Ռուսաստանի հարաբերությունների սառեցման մեղավորը երրորդ ուժեր են. Բաքվում РИА Новости-ի թղթակցի հետ զրույցում կարծիք է հայտնել Թուրքիայի ԵՄ հարցերով նախկին նախարար Էգեմեն Բաղըշը:

«Թուրքիան և Ռուսաստանը հին հարևաններ են, հին դաշնակիցներ: Բազմաթիվ բարդ ու նշանակալի հարցերում այդ երկրները հանդես են եկել նույն դիրքերից: Ցավոք, լինում է նաև այնպես, որ չհասկացվելը և երրորդ ուժերը վնաս են հասցնում հարաբերություններին: Թուրքիայի և Ռուսաստանի հարաբերությունների սառեցման մեղավորը երրորդ ուժեր են: Ոչ ոք չի կարող վնասել թուրք և ռուս ժողովուրդների բարեկամությանը: Կարծում եմ` մոտ ժամանակներս մեր երկրների հարաբերություններում կսկսվի նոր փուլ»,- ասել է նա` հավելելով, որ թուրքական կողմն արդեն «կանաչ լույս» է վառել:

«Նման նախաձեռնություն սպասում ենք նաև ռուսական կողմից»,- ընդգծել է Բաղըշը:

Հիշեցնենք, որ Ռուսաստանի և Թուրքիայի միջև լարվածություն սկսվեց, երբ Թուրքիայում խոցվեց Սիրիայում ծառայություն իրականացնող ռուսական Սու-24 ինքնաթիռը: