ՄԻՊ պաշտոնի թեկնածուն հանդիպել է ՀՅԴ-ի եւ ՀՀԿ-ի հետ

Այսօր ԱԺ-ում ՄԻՊ պաշտոնի թեկնածու Արման Թաթոյանը հանդիպել է ՀՀԿ և ՀՅԴ խմբակցությունների հետ:

Լրագրողների հետ զրույցում նա նշեց, որ խմբակցությունների հետ քննարկել է, թե նոր Սահմանադրության կարգավորումների համատեքստում ինչպիսի՞ գործունեություն պիտի ծավալի մարդու իրավունքների պաշտպանը, և, ընդհանրապես, ինչպիսին պիտի լինի նրա դերը:

«Կարեւորում եմ այս քննարկումը, քանի որ հիմնական շեշտադրումը դրված էր անհատական եւ կանխարգելիչ գործունեության տեսակները զուգակցելու, կառուցողական աշխատելու վրա»,- ասաց Թաթոյանը:

Վաղը նա կհանդիպի ԲՀԿ խմբակցության հետ: ՕԵԿ եւ «Ժառանգություն» խմբակցությունների հետ հանդիպելու նախնական պայմանավորվածություն կա, սակայն ՀԱԿ-ի հետ պայմանավորվածությունից թեկնածուն տեղյակ չէր: