Հանցագործներից մեկը վնասել է ինքն իրեն. մանրամասներ Նոր Գեղիի զինված հարձակման վերաբերյալ

Yerkir.am-ին նոր մանրամասներ են հայտնի դարձել այսօր առավոտյան Կոտայքի մարզում տեղի ունեցած զինված միջադեպի կապակցությամբ: Մեր տեղեկություններով` կազմակերպված խումբը փորձել է գողություն կատարել Նոր Գեղիի տներից մեկից: Yerkir.am-ի տեղեկություններով` տանտերը, ով սամբիստ է, փորձել է վնասազերծել հարձակվողներից մեկին: Արդյունքում` կասկածյալը զենքով կրակել է սամբիստի ոտքին, սակայն գնդակներից մեկն էլ դիպել է նրան: Այժմ կասկածյալը գտնվում է հիվանդանոցում, իսկ տուժող սամբիստին բուժօգնություն է ցուցաբերվել: Նրա կյանքին վտանգ չի սպառնում:

ՀՀ քննչական կոմիտեի նախագահի խորհրդական Սոնա Տռուզյանը yerkir.am-ին հայտնեց փաստի առթիվ հարուցվել է քրեական գործ` ՀՀ քրեական օրենսգրքի`  միաժամանակ 3 հոդվածների հատկանիշներով, այն է` կազմակերպված խմբի կողմից գողության փորձ, սպանության սպառնալիք, ապօրինի զենք զինամթերք պահելը: Կատարվում է քննություն առերևույթ հանցանք կատարած մյուս անձանց ինքնությունն ու դեպքի հանգամանքները պարզելու ուղղությամբ: Նախաքննությունը շարունակվում է: