Վիրավոր զինծառայողին դարձյալ վիրահատել են, այս անգամ` լյարդը

Տեղեկացրել էինք, որ հունվարի 23-ի առավոտյան Տավուշի մարզի Բերդի շրջանում հակառակորդի հարձակման ժամանակ վիրավորվել էր շարքային Հովհաննես Ավանեսյանը: Վնասվել էին զինծառայողի թոքն ու լյարդը: Նրան Բերդում վիրահատելուց հետո տեղափոխել էին Կենտրոնական կլինիկական զինվորական հոսպիտալ: Տղայի վիճակի` փոքր-ինչ կայունացումից հետո վիրահատել էին նաև ողնաշարը:

Yerkir.am-ի հետ զրույցում հոսպիտալի բուժծառայության պետ Արտաշես Խաչատրյանը հայտնեց, որ ողնաշարի վիրահատությունից հետո վիրահատել են նաեւ լյարդը:

«Վիրահատությունը հաջող է անցել, հետվիրահատական շրջանն ընթանում է նախատեսվածի պես: Հովհաննեսի մոտ մի փոքր դինամիկա կա դեպի լավը` թոքը նորմալ է աշխատում, լյարդը` նույնպես: Հիմա փորձում ենք մի քիչ ակտիվացնել նրան` նստեցնել, պառկած դիրքը փոխել, որ թոքերն ավելի լավ աշխատեն»,- ասաց Խաչատրյանը:

Նա նշեց նաև, որ տղայի վիճակը բժիշկները գնահատում են նույնը` ծանր կայուն: