Առանց կարդալու կարելի է փնովել ցանկացած փաստաթուղթ. Դավիթ Հարությույանը՝ սահմանադրական բարեփոխումների հայեցակարգի մասին

Կառավարության աշխատակազմի ղեկավար-նախարար Դավիթ Հարությունյանի կարծիքով` ճիշտ չէ փնովել սահմանադրական փոփոխությունների հայեցակարգը` առանց դրան մանրամասն ծանոթանալու:

Լրագրողների հետ զրույցում նա վստահեցրեց, որ սահմանադրական բարեփոխումների հայեցակարգն այն տեսքով, որով ներկայացվել է նախագահին, լուրջ առաջընթաց է, քանի որ այն վեր է հանում երկրի կառավարման համակարգի առկա թերությունները և ուրվագծում դրանց վերացման ուղիները:

Ըստ կառավարության աշխատակազմի ղեկավար-նախարարի` կարելի է փնովել ցանկացած փաստաթուղթ` առանց կարդալու, բայց եկել է ժամանակը, որ քաղաքական ուժերը լրջորեն անդրադառնան այդ հայեցակարգին, և եթե կան թերի կողմեր, ապա բարձրաձայնեն դրա մասին:

«Թե չէ պիտակավորումը լավագույն քննադատության ձևը չէ»,- ասաց նա եւ հավելեց, որ ներկայիս հայեցակարգը «լավ եփված» փաստաթուղթ է, արժանի մանրակրկիտ ուշադրության և քննարկման:

Ի դեպ, Դավիթ Հարությունյանն ասաց, որ ցավով է նշում, որ ՀՀ առաջին նախագահը չի ծանոթացել փաստաթղթին: