Լևոն Հայրապետյանին մեկուսարանից ընդամենը մեկ օրով են տեղափոխել քաղաքացիական հիվանդանոց

Ի պաշտպանություն Լևոն Հայրապետյանի շտաբը հայտարարություն է տարածել, որում, մասնավորապես, ասված է. «Երեկ տեղեկատվություն տարածվեց, թե Լևոն Հայրապետյանը տեղափոխվել է քաղաքացիական հիվանդանոց: Այս լուրը շատերը ընկալեցին հետևյալ կերպ, թե փոխվել է խափանման միջոցը և այսուհետ Լևոն Հայրապետյանը կգտնվի ստացիոնար բուժման մեջ: Սակայն, ցավոք, դա իրականությանը չի համապատասխանում, քանի որ քաղաքացիական հիվանդանոց տեղափոխելու նպատակը եղել է ընդամենը մեկօրյա բուժզննում իրականացնելը: Որից հետո մեր հայրենակիցը դարձյալ այսօր տեղափոխվել է «Մատրոսկայա տիշինա» մեկուսարան»:

Yerkir.am-ին շտաբից հայտնեցին, որ Լևոն Հայրապետյանի առողջական վիճակն այնքան է վատթարացել, որ նրան ստիպված մեկ օրով տեղափոխել են քաղաքացիական հիվանդանոց:

Հիշեցնենք, որ Լևոն Հայրապետյանի դատական գործը  նախաքննական փուլում է` երկամսյա կալանքով: Շտաբն ակնկալում էր, որ երկամսյա կալանքը կփոխվի ստացիոնար բուժմամբ, սակայն այդ ակնկալիքները չարդարացան: