ՀՀԿ-ական պատգամավորը հանգստացնում է` պատգամավորները Հրայր Թովմասյանի հետ շատ չեն շփվի

ԱԺ ՀՀԿ խմբակցության պատգամավոր Սուքիաս Ավետիսյանը շատ նորմալ է վերաբերվում ԱԺ աշխատակազմի ղեկավարի պաշտոնում Հրայր Թովմասյանի նշանակմանը:

Yerkir.am-ի այն հարցին` կկարողանա՞ Հրայր Թովմասյանը նոր պաշտոնի գործառույթները պատշաճ կատարել, պատգամավորը պատասխանեց. «Ինչպե՞ս եք պատկերացնում` նախարար աշխատած մարդը ԱԺ աշխատակազմի ղեկավար չի՞ կարող աշխատել»:

Ինչ վերաբերում է այն բանին, որ շատ պատգամավորներ հնարավոր է չէին ցանկանա աշխատել նրա հետ, Սուքիաս Ավետիսյանը շտապեց հանգստացնել` ասելով, որ պատգամավորները ԱԺ աշխատակազմի ղեկավարի հետ շատ շփումներ չունեն, որովհետև կան գործերի կառավարչության համապատասխան կառույցներ, որոնք զբաղվում են պատգամավորների սպասարկման խնդիրներով:

«Ես, ճիշտն ասած, լավագույն դեպքում տարին մեկ անգամ եմ շփվում աշխատակազմի ղեկավարի հետ, այնպես որ` աշխատակազմի ղեկավարի գործառույթը չէ` անընդհատ շփվել պատգամավորերի հետ»,- ասաց նա: