Ո՞ւմ էր պետք Ֆլորա Մարտիրոսյանի մահարձանի հետ կապված ″բազարները″

Ֆլորա Մարտիրոսյանի մահարձանը դրված է իր տեղում. եկան, խնդրեցին ու տարան` տեղը դրեցին. Yerkir.am-ի հետ զրույցում նշեց քանդակագործ Լեւոն Թոքմաջյանը:

Հիշեցնենք, որ քանդակագործ Լեւոն Թոքմաջյանին Ֆլորա Մարտիրոսյանի ընտանիքը պատվիրել էր երգչուհու մահարձանը կերտել, սակայն արդյունքը դուր չէր եկել երգչուհու ամուսնուն, ով պահանջել էր քանդակը հանել երգչուհու շիրիմի մոտից: Թոքմաջյանը նշեց` եթե պետք է վերջում քանդակն իր տեղում մնար, ո՞ւմ էին պետք այդ «բազարները»:

«Ո՞ւմ վնասեցին դրանք` ի՞նձ, թե՞ երգչուհուն: Ես արդեն ճանաչված քանդակագործ եմ, մարդիկ ինձ գիտեն իմ գործերով, այդ խոսակցությունների հետեւանքով երգչուհու հիշատակի վրա մի խազ քաշեցին: Ախր, դա ընդամենը մահարձան էր, որը դրված էր գերեզմանոցում, եթե հասարակական վայրում լիներ` կասեինք` ուրիշ բան»,- ասաց Թոքմաջյանը:

Նրա հավաստմամբ` այդ խոսակցությունները հրահրված էին, բայց թե ում կողմից, պարզ չէ, եւ երգչուհու ամուսինը կուլ է գնացել դատարկ խոսակցություններին` փոխարենը քանդակի կենդանությունը տեսնելու եւ արժեւորելու: