Ադրբեջանի ֆուտբոլի ֆեդերացիան նշել է, որ Նոբել Առուստամյանի հետ կապված իրավիճակը նաև նրա՝ Արցախ այցելելու հետ է կապված

Ադրբեջանի ֆուտբոլի ֆեդերացիայի գործադիր փոխնախագահ Էլհան Մամեդովը պարզաբանել է «Եվրո -2020» ֆուտբոլային մրցաշարին ռուսական «Матч ТВ» հեռուստաընկերության մեկնաբան, լրագրող Նոբել Առուստամյանի հավատարմագրումն արգելափակելու փաստը:

Երեկ հայտնի դարձավ, որ Ադրբեջանի կազմկոմիտեն արգելափակել է Առուստամյանի հավատարմագրումը. ըստ ՈՒԵՖԱ–ի՝ եթե մրցաշարն անցկացնող թիմերից մեկը չի տրամադրում հավատարմագիր, ապա դա վերաբերում  է ամբողջ մրցաշարին, հետևաբար՝ հեղինակավոր հաղորդավար Առուստամյանը չի կարողանա գնալ Եվրո-20-ի որևէ հանդիպման։

«Պետք է նշեմ նաև, որ այդ անձը տարիներ շարունակ բազմիցս այցելել է Ադրբեջանի օկուպացված հողեր և այդ այցերի ընթացքում թույլտվություն չի ստացել Ադրբեջանի համապատասխան կառույցներից: Նա խախտել է մեր երկրի օրենքները՝ անհարգալից վերաբերմունք ցուցաբերելով Ադրբեջանի տարածքային ամբողջականության նկատմամբ»,- ասել է Մամեդովը: