Ոչ մի ճնշում չի կարող ստիպել, որ Վրաստանը հետ կանգնի ԵՄ ինտեգրումից. Դավիթ Ուսուպաշվիլի

ՆԱՏՕ-ին և Եվրամիությանը ինտեգրվելու հարցում Վրաստանի դիրքորոշումն անփոփոխ է: Այս մասին այսօր ասել է Վրաստանի խորհրդարանի ղեկավար Դավիթ Ուսուպաշվիլին՝ պատասխանելով Yerkir.am-ի այն հարցին՝ հնարավո՞ր է, որ Մոսկվայի ճնշման ներքո Վրաստանը հետ կանգնի ԵՄ ինտեգրման որոշումից: Դավիթ Ուսուպաշվիլիի խոսքով՝ Եմ ինտեգրման հարցում յուրաքանչյուր երկիր ունի իր մոտեցումը:  

«Վրաստանի դիրքորոշումն այս հարցերում չի փոխվել նույնիսկ իշխանափոխությունից հետո և մենք հետ չենք կանգնելու մեր ընտրած ուղուց»,-ասաց նա: Ուսուպաշվիլին ընդգծեց, որ Վրաստանն այդ մասին բազմիցս խոսել է և արդեն ցույց է տվել եվրաինտեգրման ճանապարհով շարժվելու իր վճռականությունը: Վրաստանի խորհրդարանի նախագահը նշեց, որ ոչ մի ճնշում չի կարող ստիպել Վրաստանին հետ կանգնել իր որոշումից: Հիշեցնենք, որ Վրաստանը Վիլնյուսում կայացած ԵՄ Արևելյան գործընկերության գագաթնաժողովի ընթացքում նախաստորագրել է ԵՄ-ի հետ Ասոցացման համաձայնագիրը: