Nout.am-ը վիրավորել է ''Ռիչ քոմփյութերս''-ի հաճախորդներին

«Էյջ Թի Էլեքթրոնիքս» ընկերությունը  դիմել է ՏՄՊՊՀ-ին՝ հայտնելով, որ մրցակից՝  Nout.am ընկերությունը համացանցում տեղադրել է վարկաբեկող տեղեկատվության իրենց պատկանող «Ռիչ Քոմփյութերս» ապրանքանիշի վերաբերյալ. այսօր կայացած ՏՄՊՊՀ նիստի ժամանակ, քննելով այս դիմումը, հայտնեց հանձնաժողովի ներկայացուցիչը:

Մասնավորապես' Nout.am-ը տարածել է, որ իբր հաճախորդներից մեկը միջին որակի նոութբուքը «Ռիչ Քոմփյութերս»-ից գնել է 365 000 դրամով, մինչդեռ այն իրենց մոտ արժե 209 000 դրամ. «Հիմա դուք երևի կմտածեք` խեղճ մարդ, բայց հավատացեք այդպիսի հիմարներին հենց էդպես էլ պետք է»,- իր գրառումը եզրափակել է Nout.am-ը: 

«Մեր հանձնաժողովի գործունեության  համար շատ կարեւոր նշանակություն ունի, թե տնտեսվարողներն ինչպիսի գովազդային քաղաքականություն են իրականացնում, ինչպիսի տեղեկատվություն են ներկայացնում սպառողներին»,- նշեց հանձնաժողովի նախագահ Արտակ Շաբոյանը:

Հանձնաժողովը եզրակացրեց, որ Nout.am-ի վարքագիծը ակնհայտորեն հակասում է օրենսդրությանը: Հանձնաժողովի պահանջով գրառումն անմիջապես հանվել է համացանցից, իսկ ընկերությունը կվճարի տուգանք՝ օրենքի խախտման և մրցակից ընկերությանը վարկաբեկելու համար` տարեկան հասույթի 1 տոկոսի չափով:

Լուսանկարը` ընկերության ֆեյսբուքյան էջից