Բակո Սահակյանը մասնակցել է ազատամարտիկների հիշատակը հավերժացնող հուշահամալիրի բացմանը

ԼՂՀ նախագահ Բակո Սահակյանը հոկտեմբերի 25-ին Ավետարանոց գյուղում մասնակցել է Արցախյան հերոսամարտում զոհված ազատամարտիկների հիշատակը հավերժացնող հուշահամալիրի բացման հանդիսավոր արարողությանը:

Իր խոսքում երկրի ղեկավարն ընդգծել է, որ իրենց պարտքն է միշտ հիշել մեր մարտիրոսների սխրանքն ու հերոսությունը, անել հնարավորը, որպեսզի իրականացվեն նրանց իղձերն ու ցանկությունները, որոնց թվում ամենանվիրականը ազատ, անկախ պետությունն է եւ նրա շարունակական զորացումը:

Նախագահ Սահակյանի խոսքով` այս հուշահամալիրը պետք է դառնա ուխտատեղի՝ անցյալը հիշելու, մեր հերոսներով հպարտանալու եւ, այսպիսով, ապագայի հանդեպ լավատեսությամբ ու հույսով լցվելու համար:

Այնուհետեւ երկրի ղեկավարը պետական պարգեւներ է հանձնել գյուղի մի խումբ ազատամարտիկների:
Միջոցառմանը մասնակցել են Հայ Առաքելական Եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, պաշտոնատար այլ անձինք: