Հայոց ցեղասպանությանը նվիրված հուշարձան` Փասադենայում

Փասադենայի քաղաքապետական խորհուրդը սեպտեմբերի 9-ին միաձայն  վավերացրել է Հայոց ցեղասպանության զոհերի հիշատակին նվիրված հուշարձանի կառուցման նախագիծը: Հուշարձանը պիտի կանգնեցվի Փասադենայի «Մեմորիալ» զբոսայգում. տեղեկացնում է «Ասպարեզը»:

Քվեարկությունից առաջ ելույթ ունենալու դիմում է ներկայացրել 36 պատգամավոր,  որոնց գերակշիռ մեծամասնությունը ի նպաստ հուշարձանի է արտահայտվել: Նաեւ` 1093 հոգի խնդրագիր-դիմում է ստորագրել՝ աջակցելով Հայոց ցեղասպանության 100-րդ տարելիցի  առիթով քաղաքում հուշարձան կանգնեցնելու գաղափարին:  

Հուշարձանի նախագծի հեղինակն է Քեթրին Մենարտը: Նախագծի համաձայն՝ հուշարձանը պետք է լինի 16 ոտնաչափ բարձրության եւ բոլորակաձեւ (28 ոտնաչափ տրամագծով) հարթակով եռանկյուն ցայտաղբյուր, որից 21 վայրկյանը մեկ անգամ  մեկ կաթիլ ջուր պիտի ցայտի: Այդ արագությամբ մեկ տարվա ընթացքում աղբյուրի մեջ 1.5 միլիոն կաթիլ ջուր պիտի հավաքվի՝ խորհրդանշելով Ցեղասպանության զոհերին: