Ով գնա Թաքսիմ հրապարակ, ահաբեկիչ կհամարվի. Էգեմեն Բաղըշ

Ով գնա Ստամբուլի Թաքսիմ հրապարակ, որտեղ վերջին 20 օրերի ընթացքում շարունակվում էին հակակառավարական բողոքները, կհամարվի ահաբեկչական կազմակերպության անդամ կամ կողմնակից. հայտարարել է Թուրքիայի ԵՄ հարցերով պետնախարար Էգեմեն Բաղըշը A Haber-ին տված հարցազրույցում:

Նախարարը քննադատել է արտասահմայան ԶԼՄ-ներին Թուրքիայի իրադարձությունները «չափազանցված» ներկայացնելու համար: «Բազմաթիվ հեռարձակումները, որոնք չէին ընդհատվում անգամ գովազդով, վնաս հասցրեցին Թուրքիայի վարկանիշին: Սակայն այդ երկարաձիգ հեռարձակումների պատճառը ֆինանսական է, եւ դա կբացահայտվի: Միջազգային հեռուստաալիքները, ինչպիսիք են BBC-ն եւ CNN-ը, առանց գովազդի չէին հեռարձակի: Ինչ-որ մեկը ինչ-որ կերպ ֆինանսավորում էր դրանք»,- համարում է Բաղըշը: