Նեթանյահուին պարտադրել են հրաժարվել 138 հազար դոլար արժողությամբ մահճակալից

Իսրայելի վարչապետ Բենիամին Նեթանյահուի` Թել Ավիվից Լոնդոն թռիչքի ժամանակ ինքնաթիռում  երկտեղանի մահճակալ է տեղադրված եղել` 138 հազար դոլար արժողությամբ. տեղեկացնում է ИТАР-ТАСС-ը` վկայակոչելով Daily Telegraph թերթը:

Ըստ պարբերականի` Նեթանյահուն մեկնել էր Լոնդոն` Մարգարետ Թետչերի հուղարկավորությանը մասնակցելու, եւ 5 ժամանոց թռիչքի ընթացքում նրան, չգիտես` ինչու, մահճակալ է հարկավոր եղել:

Այն բանից հետո, երբ լուրը հայտնվել է իսրայելական ԶԼՄ-ներում, 10 հազար իսրայելցիներ դուրս են եկել փողոց` բողոքելով իսրայելական կառավարության խիստ տնտեսական քաղաքականության դեմ:

Կառավարության աղբյուրի հավաստմամբ` Նեթանյահուն տեղյակ չի եղել մահճակալի արժողության մասին: «Երբ այդ մասին իմացվել է, վարչապետն անմիջապես հանձնարարել է հանել այն ինքնաթիռից»,- հավելել է նա: