Իրանի նախագահն այցելելու է Թուրքիա

Իրանի նախագահ Մահմուդ Ահմադինեժադը դեկտեմբերին 17-ին Թուրքիայի վարչապետ Ռեջեփ Թայիփ Էրդողանի հրավերով այցելելու է Անկարա:

Սպասվում է, որ հանդիպման ընթացքում քննարկվելու է հարցերի լայն շրջանակ, այդ թվում` սիրիական ճգնաժամը, նաեւ Վաշինգտոնի պատժամիջոցների շրջանակներում Թուրքիայի` իրանական նավթ չգնելու որոշումը, թեեւ Թուրքիան մտադիր չէ դադարեցնել Իրանի հետ «ոսկի գազի դիմաց» գործարքը:

Հարկ է նշել, որ երկու երկրների միջեւ հարաբերությունները լարված են Սիրիայի պատճառով: Իրանական պաշտոնյաները քննադատում են Թուրքիային այն բանի համար, որ այն կանգնել է Արեւմուտքի կողքին` Ասադի վարչակազմը տապալելու համար: Թուրքիայի վարչապետն էլ քննադատել է իրանական իշխանություններին Քրդական բանվորական կուսակցության հետ «պոտենցիալ կապեր» ունենալու համար: