Սթրոս Կանի դեմ բողոքող սպասուհուն իսկապես բռնաբարել են

Ֆրանսիական L’Express ամսագիրը մանրամասներ է հրապարակել  Արժույթի միջազգային հիմնադրամի նախկին նախագահ Դոմինիկ Սթրոս Կանի կողմից նյույորքյան Sofitel հյուրանոցի 31-ամյա սպասուհու բռնաբարության վերաբերյալ:

Համաձայն ներկայացված փաստաթղթերի` սպասուհի Նաֆիստա Դիալոյին իսկապես բռնաբարել են, բժիշկների եզրակացության մեջ նշվում է. «Ախտորոշումը` բռնություն: Վնասվածքների պատճառը` բռնաբարություն»:

Սթրոս Կանի փաստաբաններն այս փաստաթուղթը համարել էին ոչ հիմնավոր, քանի որ այն հիմնված է միայն սպասուհու վկայությունների վրա, իսկ նա բազմիցս ստել եւ փոխել է իր ցուցմունքները:

Reuters-ը տեղեկացնում է, որ հրապարակված հոդվածում նշվում է, թե սպասուհին հիվանդանոց է գնացել մայիսի 14-ին` լացակումած եւ վնասված ուսով, որը, հավանաբարկ ստացել է Սթրոս Կանի հետ քաշքշուկի հետեւանքով:

Դիալոյի փաստաբանը հայտարարել է, որ հետաքննության արդյունքում պարզվել է, որ Սթրոս Կանը ստել է, թե իր պաշտպանյալի հետ սեռական հարաբերություններ է ունեցել նրա կամքով: Իսկ Սթրոս Կանի փաստաբանները նշում են, որ հավանական է` սպասուհին վնասվածքը ստացել է մինչեւ մայիսի 14-ը: