Թուրքական խտրականության վառ դրսեւորում

Թուրքիայի Սահմանադրական դատարանը Սահմանադրությանը համապատասխանող է համարել 1934թ. ընդունված օրենքը, որի համաձայն` Թուրքիայի քաղաքացիներն իրավունք չունեն կրել օտար ազգանուններ: Այսինքն` հայերը, քրդերը, ասորիները, չերքեզները և հրեաները չեն կարող ազգային ազգանուններով գրվել: 

Քրդական «Ֆըրաթ» գործակալության տեղեկացմամբ` ազգությամբ ասորի Ֆավլուս Այը իր անուն ու ազգանունը փոխելու և Պաուլուս Բարթումա դարձնելու հայց էր ներկայացրել դատարան, որը, սակայն, հիմք ընդունելով 1934թ. օրենքը, մերժել էր Այի հայցը:

Այդ որոշումը չեղյալ հայտարարելու` Սահմանադրական դատարանին ուղղված դիմումի մեջ ասորին նշել է, որ դա ազգային խտրականություն է եւ հակասում է երկրի Հիմնական օրենքում ամրագրված հավասարության սկզբունքին: Սակայն Սահմանադրական դատարանի բոլոր 9-ը անդամները դեմ են քվեարկել հայցվորի` դատարանի որոշումը չեղյալ հայտարարելու պահանջին: