Զինվորական օմբուդսմենի ինստիտուտի ստեղծումն օրակարգային է

Այսօր Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ ՀրայրԿարապետյանը բանակում մարդու իրավունքներին նվիրված քննարկման ընթացքում ասաց, որ հրամանատարների եւ զինվորների պարտականություններն ու իրավունքները պետք է օրենքով ամրագրվեն: Այս պահին ԱԺ-ում զինված ուժերի կարգապահական կանոնագրքի 3 նախագիծ է քննարկվում:

«Պետք է օրենք լինի` զինված ուժերում բոլոր կարգապահական փոխհարաբերությունները կարգավորելու համար»,- նշեց Հ. Կարապետյանը:

Նա նաեւ տեղեկացրեց, որ մարտի 10-ին, երբ Հայաստան կժամանեն եվրոպական փորձագետներ, ԱԺ լսումներ կկազմակերպվեն այս թեմայով:

Հրայր Կարապետյանը օրակարգային համարեց նաեւ Հայաստանում զինվորական օմբուդսմենի ինստիտուտի ստեղծումը: 

Սակայն ՀՀ մարդու իրավունքների պաշտպանի զինծառայողների հարցերով խորհրդական Ռուստամ Մահմուդյանի համոզմամբ` մինչ այդ սահմանադրական լուրջ փոփոխություններ պետք է կատարվեն: