Պետք է ստեղծել Հայաստան–Իրան–Ռուսաստան ռազմավարական եռանկյունի. ԱԳ նախկին նախարար

«Մեզ համար ցանկացած դաշինք այնքան արժեք ունի, որքան այն նպաստում է մեր սուբեկտայնության ամրապնդմանը, այլ ոչ թե փոխարինում է նրան»,-«Միասին» շարժման կողմից կազմակերպված քննարկման ժամանակ հայտարարել է ՀՀ նախկին արտգործնախարար Արա Այվազյանը:

«Այս համատեքստում ես կառանձնացնեի ՌԴ-ն, որի հետ պետք է վերագործարկել այլ բովանդակությամբ մեր ռազմավարական համագործակցությունը, և ավելի լայն տարածաշրջանային իմաստով խորացնել մեր ռազմավարական փոխգործակցությունը Իրանի հետ՝ նպատակ ունենալով ստեղծել Հայաստան-Իրան-Ռուսաստան ռազմավարական եռանկյունի»,- ընդգծել է նա և նշել, որ այս գաղափարը հետզհետե բյուրեղանում է և՛ Թեհրանում, և՛ Մոսկվայում: «Հյուսիս-հարավ նախագիծը կարող է դառնալ այս ռազմավարական եռանկյունու ողնաշարը»,- հավելել է նա: