Հալեպում պետական հաստատությունները վերսկսել են աշխատանքը, դպրոցները մեկ շաբաթ փակ կմնան

Հալեպում այսօր վերսկսվել են պետական հաստատությունների աշխատանքները, իսկ քաղաքի հայ համայնքը սկսել է վերադառնալ բնականոն կյանքի։ Այս մասին «Փաստինֆո»-ին հայտնել է Սիրիայի խորհրդարանի նախկին պատգամավոր Մարիա Գաբրիելյանը։

Նրա խոսքով՝ երեկ մինչև ուշ ժամ քրդական երեք շրջաններից զինյալները դուրս են բերվել և տեղափոխվել Եփրատի արևելք՝ երկրի հյուսիս-արևելյան շրջաններ։
Գաբրիելյանը նշել է նաև, որ այս շաբաթ դպրոցներում նախատեսված էր կիսամյակային քննությունների շրջանը, սակայն այն հետաձգվել է մեկ շաբաթով։

Նույն ժամկետով հետաձգվել են նաև համալսարանների դասերը։

Արդեն հայտնել ենք, որ մի քանի օր է Հալեպում ռազմական գործողություններ էին ընթանում հայաշատ բնակավայրերի հարևանությամբ քրդական երեք բնակավայրերում: