Վահան Քերոբյանին առնչվող գործով արդեն 9 ձերբակալված կա․ ՔԿ

ՀՀ էկոնոմիկայի նախկին նախարար Վահան Քերոբյանին առնչվող քրեական վարույթով ձերբակալվածների թիվը հասել է 9-ի, բոլորին կալանավորելու վերաբերյալ միջնորդություն է ներկայացվել դատարան։ Այս մասին ֆեյսբուքյան իր էջում հայտնել է ՀՀ քննչական կոմիտեի մամուլի խոսնակ Կիմա Ավդալյանը։ 

«Հանցավոր կազմակերպության անդամների կողմից 2008-2014 թվականներին Երևան համայնքին պատկանող շուրջ 73.8 հա մակերեսով հողատարածքները հափշտակելու, առանձնապես խոշոր չափերով փողերի լվացում կատարելու վերաբերյալ նախաձեռնված քրեական վարույթի նախաքննության ընթացքում ձերբակալվել է 9 անձ»,- գրել է Ավդալյանը։

Ավելի վաղ հայտնել էինք, որ ՀՀ քննչական կոմիտեն էկոնոմիկայի նախկին նախարար Վահան Քերոբյանին կալանավորելու միջնորդություն է ներկայացրել դատարան։ 

ՔԿ-ն այսօր առավոտյան հայտնել էր, որ նշված վարույթով 12 անձի ձերբակալելու որոշում է կայացվել, որոնցից 7-ին ձերբակալել էին։ Օրվա ընթացքում, փաստորեն, ձերբակալել են եւս երկու հոգու։