Մետրոպոլիտենում այսօր գնացքների աշխատանքը խափանվել էր. գծերի վրա քաղաքացի է հայտնվել

Երևանի Կ. Դեմիրճյանի անվան մետրոպոլիտենի «Սասունցի Դավիթ» կայարանի երկաթուղային գծերի հատվածում քաղաքացի է հայտնվել։ Այս մասին Sputnik Արմենիայի հետ զրույցում ասաց մետրոպոլիտենի մամուլի խոսնակ Աննա Ասլանյանը։

«Մեքենավարը տեսել է քաղաքացուն, ստիպված արգելակել է, ու այդ պատճառով էլ աշխատանքը փոքր–ինչ խափանվել է։ Նշված ժամանակից մոտ 10 րոպե է գնացքն ուշացել։ Կայարաններից մեկի բաց հատվածում է եղել միջադեպը», - նշեց Ասլանյանը։

Հարցին` թե ինչպես է քաղաքացին հայտնվել գծերի վրա, նա շեշտեց` գուցե տեղանքում չի կողմնորոշվել։

Մետրոյի կայարանում գտնվող Sputnik Արմենիայի աղբյուրի տեղեկություններով գնացքն ուշացել է ավելի քան 20 րոպե, իսկ «Հանրապետություն» և «Գարեգին Նժդեհ» հրապարակներում նաև մարդկանց են ստուգել։

Sputnik Արմենիան նաև փորձեց այս ինֆորմացիան ճշտել ՆԳՆ-ից, որտեղից հայտնեցին, որ որևէ ստուգում ոստիկանության ծառայողները չեն իրականացնում և չեն իրականացրել։

Այս պահին մետրոպոլիտենի աշխատանքն ամբողջությամբ վերականգնվել է։