Կրեմլն արձագանքել է ՀՀ-ԱՄՆ ռազմավարական գործընկերության մասին ստորագրվելիք փաստաթղթին

Հայաստանի և ԱՄՆ-ի միջև ռազմավարական գործընկերության զարգացումը Երևանի ինքնիշխան իրավունքն է. այս մասին, ՏԱՍՍ-ի փոխանցմամբ, ասել է ՌԴ նախագահի մամուլի քարտուղար Դմիտրի Պեսկովը:

«Բոլոր երկրների, այդ թվում՝ ԱՄՆ-ի հետ հարաբերությունները զարգացնելը Հայաստանի ինքնիշխան իրավունքն է: Ռուսաստանի Դաշնությունը մտադիր է կառուցել իր կապերը Հայաստանի հետ»,- ասել է Պեսկովը՝ միևնույն ժամանակ ընդգծելով, որ ԱՄՆ-ն երբեք կայունացնող դեր չի խաղացել Հարավային Կովկասում, ավելի շուտ՝ ընդհակառակը:

Նա հավելել է, որ Ռուսաստանը Հայաստանի հետ ունի իր երկկողմ հարաբերությունները և դրանք ռուսական պետության համար թանկ են։ Ամենակարևորը, ըստ Պեսկովի, ԵԱՏՄ-ում ինտեգրացիոն գործընթացներն են։

«Բացի երկկողմ շփումներից, մեզ համար, իհարկե, շատ կարևոր են մեր փոխգործակցության ասպեկտներն ինտեգրացիոն գործընթացների, այդ թվում՝ ԵԱՏՄ-ի շրջանակում։ Այս ամենը համագործակցություն է, որը զգալի դիվիդենտներ է ապահովում Հայաստանի և նրա ժողովրդի համար»,- ասել է Պեսկովը: