Որոշել են փակել նաև ագրարայինի «Հասուն ՀԱՍԿ» պաշտոնաթերթը

Yerkir.am-ի տեղեկություններով կփակվի նաև Հայաստանի ազգային ագրարային համալսարանի «Հասուն ՀԱՍԿ» պաշտոնաթերթը։

Փետրվարի 16-ին Հայաստանի ազգային ագրարային համալսարանի հոգաբարձուների խորհուրդը ռեկտորի պարտականությունները կատարող Հ. Զաքոյանի ներկայացմամբ ի թիվ բազմաթիվ կրճատումների կրճատել էր նաև համալսարանի «Հասուն ՀԱՍԿ» պաշտոնաթերթի խմբագրի հաստիքը: Սակայն հետագայում աղմուկից խուսափելու համար որոշել են հաստիքը կրճատել նոր ուսումնական տարվանից:

«Հասուն ՀԱՍԿ» պաշտոնաթերթը վերաբացվել է 2000 թ. նոյեմբերին: Այն նախկին երկու բուհերի «Գյուղատնտես» (Հայկական գյուղատնտեսական ինստիտուտ) և «Կադրերի համար» (Երևանի անասնաբուծական-անասնաբուժական ինստիտուտ) պարբերականների լավագույն ավանդույթների կրողն է: 2018 թվականի սեպտեմբերից պաշտոնաթերթը սփռվում է միայն էլեկտրոնային տարբերակով: 2000 թվականից «Հասուն ՀԱՍԿ» պաշտոնաթերթի խմբագիրն ու թողարկումների պատասխանատուն բանասիրական գիտությունների թեկնածու, պատմագիտության դոցենտ Անի Խուդավերդյանն է:

Պաշտոնաթերթը մշտապես լավագույն միջոց է եղել ոչ միայն համալսարանի անցուդարձի լուսաբանման, այլ նաև հրաշալի հարթակ է եղել համալսարանի ստեղծագործող ուսանողների ու աշխատակիցների համար: