Իրանը բալիստիկ հրթիռների ուղղորդման ինտելեկտուալ համակարգ ունեցող 3 երկրներից մեկն է․ ԻՀՊԿ ղեկավար

 Իրանն աշխարհի այն երեք երկրներից մեկն է, որն ունի բալիստիկ հրթիռների ուղղորդման ինտելեկտուալ համակարգ։ Ինչպես «Արմենպրես»-ը տեղեկանում է ՏԱՍՍ գործակալությունից, այդ հայտարարությամբ հանդես է եկել Իսլամական հեղափոխության պահապանների կորպուսի (ԻՀՊԿ) հրամանատար գեներալ-լեյտենանտ Հոսեյն Սալամին։

«Բալիստիկ հրթիռների ինտելեկտուալ ուղղորդման համակարգը չափազանց բարդ տեխնոլոգիա է, և այն ունեն ամբողջ աշխարհում միայն երեք պետություններ, այդ թվում՝ Իրանը: Դա ցույց է տալիս մեր երկրի առաջընթացը, թեև մեր հակառակորդներին դա դուր չի գալիս», - ասել է նա:

Սալամին նաև խոսել է ԱԹՍ-ների ոլորտում երկրի հաջողությունների մասին։

«Բացի այդ, մենք հաջողությունների ենք հասել անօդաչու թռչող սարքերի արտադրության ոլորտում: Մեր անօդաչու թռչող սարքերը կարող են արհեստական ​​ինտելեկտի միջոցով խոցել նավեր մի քանի հազար կիլոմետր հեռավորության վրա, և մենք նույնիսկ կարող ենք որոշել այն վնասը, որը դրանք հասցրել են նավին», - ընդգծել է ԻՀՊԿ-ի հրամանատարը:

Հոկտեմբերի 3-ին Իրանի զինված ուժերը ներկայացրել են Kaman-19 նոր անօդաչու թռչող սարքը, որը կարող է օգտագործվել որպես ռադիոէլեկտրոնային պայքարի միջոց և ունակ է օդում մնալ առնվազն մեկ օր։ Նոր անօդաչու թռչող սարքը ներկայացվել է Իսլամական Հանրապետությունում անցկացվող բանակային զորավարժությունների շրջանակներում, որոնց ընթացքում մշակվել  են անօդաչու թռչող սարքերի թռիչքները և դրանց համակարգումը մարտական ​​առաջադրանքներ կատարելիս: