Պրիգոժինը Բելառուս «հեռանալուց» հետո առաջին աուդիոուղերձն է ձայնագրել

«Վագներ» մասնավոր ռազմական ընկերության հիմնադիր Եվգենի Պրիգոժինը մեկ շաբաթվա ընթացքում առաջին անգամ ձայնագրել է աուդիո հաղորդագրություն: Այն հրապարակվել է Telegram խմբավորմանը մոտ գտնվող Grey Zone ալիքում։ 

«Այսօր մենք առավել քան երբեւէ ձեր աջակցության կարիքն ունենք։ Շնորհակալություն դրա համար: Ես ուզում եմ, որ դուք հասկանաք, որ մեր «Արդարության երթը» ուղղված էր դավաճանների դեմ պայքարին եւ մեր հասարակությանը մոբիլիզացնելուն: Եվ կարծում եմ, որ շատ բան մեզ հաջողվեց»,-ասել է նա։

Պրիգոժինը նաեւ վստահություն է հայտնել, որ մոտ ժամանակներս բոլորը կտեսնեն իրենց «հաջորդ հաղթանակները ճակատում»։  

Իր հետագա ծրագրերի եւ գտնվելու վայրի մասին Պրիգոժինը չի հայտնել։

Ապստամբության ավարտից հետո Պրիգոժինը միայն մեկ անգամ է հանդես եկել հայտարարությամբ։ Հունիսի 26-ին նրա մամուլի ծառայությունը հրապարակել է 11 րոպե տեւողությամբ գրառում, որում նա ներկայացնում էր կատարվածի իր վարկածը եւ հավաստիացնում, որ չի պատրաստվում «տապալել ռեժիմը»։