Թուրքիան ցանկանում է բարեկամանալ Հունաստանի հետ

Թուրքիան ձգտում է ապահովել, որ Անկարայի և Աթենքի միջև առկա տարաձայնությունները լուծվեն խաղաղ ճանապարհով»: Այս մասին հայտարարել է Թուրքիայի ազգային պաշտպանության նախարարության ղեկավար Հուլուսի Աքարը. հայտնում է Anadolu-ն։

Նա նշել է, որ Թուրքիան միշտ մեկ քայլ առաջ է լինելու խաղաղության ճանապարհին։

«Մեր նպատակն է արդար կերպով կիսել Էգեյան ծովի բոլոր հարստությունները: Էգեյան ծովը բարեկամության ծով է։ Թուրքիան դրան է ձգտում։ Մենք անկեղծորեն բարեկամության ձեռք ենք մեկնում մեր հարեւան Հունաստանին»,- ասել է նախարարը։

Նրա խոսքով՝ Աթենքի հետ հարաբերություններում Անկարան ելնում է միջազգային իրավունքի հարգանքից և մշտապես հանդես է գալիս բարիդրացիության սկզբունքի գերակայության օգտին:

Թուրքիայի ռազմական գերատեսչության ղեկավարը կարեւորել է երկու երկրների միջեւ երկխոսության զարգացումը` կոչ անելով հունական կողմին՝ ավելի ակտիվ քայլեր ձեռնարկել այդ ուղղությամբ։

«Մեր հարեւանները չափազանց դանդաղ քայլեր են անում երկխոսության գործընթացում։ Ակնկալում ենք, որ նրանք մի փոքր ավելի ակտիվ կլինեն»,- ասել է Աքարը:

Նա բարձր է գնահատել Թուրքիայի և Հունաստանի պաշտպանության նախարարությունների պատվիրակությունների միջև վստահության միջոցների ամրապնդման շուրջ բանակցությունները։ Աքարի խոսքով՝ Անկարան ակնկալում է հունական կողմի հետ բանակցությունների չորրորդ փուլ։