Ալիևն ասել է, որ ԵԱՀԿ Մինսկի խումբը ստեղծվել է «Ադրբեջանի տարածքների հավերժ օկուպացիայի համար»

Ադրբեջանը կռվել է ոչ միայն համայն հայության, այլ նաև նրան աջակցողների դեմ և հաղթել է. հայտարարել է Ադրբեջանի նախագահ Իլհամ Ալիևը:

Ելույթ ունենալով Արցախից զավթված Շուշիում ընթացող, այսպես կոչված, «Աշխարհի ադրբեջանցիների 5-րդ համագումարում», նա ընդգծել է, որ «Ադրբեջանը ցույց է տվել, թե ինչպես է պետք պատերազմել քաղաքակիրթ ձևով. հայկական բանակը պարտված է, այսօր այն փաստացի չկա, մարտերի ընթացքում տեղի է ունեցել զանգվածային դասալքություն Հայաստանի զինված ուժեր շարքերից, մինչդեռ Ադրբեջանի ԶՈւ ոչ մի զինծառայող դասալիք չի դարձել»:

Խոսելով ԵԱՀԿ Մինսկի խմբի ձևաչափի մասին՝ Ալիևն ասել է, որ  այն, ըստ էության, չի ստեղծվել հայ-ադրբեջանական հակամարտության կարգավորման համար, հետևաբար՝ դրա աշխատանքից որևէ արդյունք չի եղել։ ԵԱՀԿ Մինսկի խումբը, Ալիևի խոսքով, ստեղծվել է հանուն «հանրապետության տարածքների հավերժ օկուպացիայի, քանի որ դրա վրա ազդել է համանախագահող երկրներում հայկական ազգայնականության հզոր լոբբին»։